BARN Media

ராஜபாளையத்தில் திருமண வீட்டினர் சென்ற பேருந்து சாலையோரம் கவிழ்ந்து விபத்து

ஸ்ரீவில்லிபுத்தூரைச் சேர்ந்த நிதிஷ்குமார் என்பவருக்கும், இளந்துறை கொண்டானைச் சேர்ந்த வித்யா சாந்தகுமாரிக்கும் நாளை திருமணம் நடைபெறவிருந்த நிலையில், நேற்று இரவு நிச்சயதார்த்தம் முடிந்து மணமகன் வீட்டார் பேருந்தில் ஊர் திரும்பியுள்ளனர். பேருந்து குன்னூர் அருகே வந்தபோது, ஓட்டுநரின் கட்டுப்பாட்டை இழந்து சாலையோரம் தலைகீழாகக் கவிழ்ந்தது. இந்த கொடூர விபத்தில் பேருந்தில் பயணித்த செல்வம், கம்மாடச்சி ஆகிய இருவர் சம்பவ இடத்திலேயே உடல் நசுங்கி பலியாகினர். காயமடைந்த சிறுமி உட்பட 40-க்கும் மேற்பட்டோர் மீட்கப்பட்டு அரசு மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ளனர். மணமக்கள் இருவரும் தனி வாகனத்தில் சென்றதால் அதிர்ஷ்டவசமாக உயிர் தப்பினர். தகவலறிந்து மருத்துவமனைக்கு நேரில் வந்த சமூக நலம் மற்றும் மகளிர் மேம்பாட்டுத் துறை அமைச்சர் ஜெகதீஸ்வரி, மாவட்ட ஆட்சியர் சுகபுத்ரா ஆகியோர் பாதிக்கப்பட்டவர்களுக்கு ஆறுதல் கூறினர். விபத்து குறித்து வழக்குப்பதிவு செய்துள்ள தளவாய்புரம் காவல்துறையினர், பேருந்து ஓட்டுநர் கோபாலகிருஷ்ணனை கைது செய்து விசாரணை நடத்தி வருகின்றனர்.