SALOMAT QALB | FARRUH SOIPOV

#farruh_soipov #maruza ҲАР БИР МЎМИН-МУСУЛМОН УЧУН ЗАРУР БЎЛГАН ДУО Азизлар, оламларга раҳмат бўлган ва бизларнинг  тўғри йўлга – ҳақ динга келишимизга ҳарис – ташна бўлган, бизларни Аллоҳнинг раҳматига – жаннатига етакловчи, У Зотнинг суюкли ва сўнгги Пайғамбари Муҳаммад алайҳиссаломнинг энг кўп ўқиб юрган дуоларидан бири қайси эди, биласизми? Албатта, бу: «Эй, қалбларни ўзгартириб турувчи Зот, қалбимни динингда собитқадам қилгин!» деган дуо эди. Дуонинг ўқилиши: يَا مُقَلِّبَ الْقُلُوبِ ثَبِّتْ قَلْبِي عَلَى دِينِكَ «Йаа, Муқоллибал қулууб, саббит қолбий ъала дийника!» Ҳозирги кунимизда турли фитналарга чалғимай динда собит туришлик сабабларидан бири бўлган ушбу дуо нечоғлик зарурлигини Анас розияллоҳу анҳу ривоят қилган ушбу ҳадиси шарифдан билиб оламиз: «Расулуллоҳ соллаллоҳу алайҳи васалламнинг кўп ўқиб юрадиган дуолари: «Эй, қалбларни ўзгартириб турувчи Зот, қалбимни динингда собитқадам қилгин!» эди.  Мен: «Ё Расулаллоҳ, ахир, биз сиз келтирган динга иймон келтирган бўлсак, (шундан кейин ҳам) биздан хавф қиласизми?!» – деб сўрадим. (У Зот) «Ҳа, қалблар Аллоҳ таолонинг бармоқларидан икки бармоқ ўртасидадир, уларни Ўзи истаган томонга айлантириб қўя олади»,– дедилар» (Термизий ривояти).