Yotishda aytiladigan duolar / Shayx Abdulloh Zufar

Al-Bara ibn Azib roziyallohu anhu rivoyat qiladilar: Rasululloh ﷺ dedilar: “Agar yotmoqchi bo‘lsang, namoz uchun tahorat olgandek tahorat ol, so‘ng o‘ng tomoning bilan yot. Keyin shunday degin: Allohumma aslamtu nafsi ilayka, va vajjahtu vajhiya ilayka, va favvadtu amri ilayka, va alja’tu zahri ilayka, rag‘batan va rohbatan ilayka, la malja’a va la manja minka illa ilayka, amantu bikitobikallaziy anzalta, va binabiyyikallaziy arsalta. (Allohim, o‘zimni Senga topshirdim, yuzimni Senga qaratdim, ishlarimni Senga havola qildim, Senga suyanib taslim bo‘ldim — rag‘bat va qo‘rquv ila. Sendan boshqa panoh ham, najot ham yo‘q, faqat O‘zingdan. Nozil qilgan Kitobingga va yuborgan Payg‘ambaringga iymon keltirdim.) Agar shu kecha vafot etsang, fitrat ustida o‘lasan. Va bu so‘zlar oxirgi aytgan so‘zing bo‘lsin.”