ARAFA KUNI | ENG FAZILATLI KUN | SHAYX SOLIH MUNAJJID

ARAFA KUNI – Nabiy sollallohu alayhi vasallam: “Duolarning eng afzali – Arofa kunida qilingan duodir. Men aytgan va avvalgi barcha payg‘ambarlar aytgan eng afzal so‘z – “Laa ilaaha illallohu vahdahu laa shariyka lahu, lahul mulku va lahul hamdu va huva ‘alaa kulli shay’in qodiyr”, kalimasidir”. (Termiziy rivoyati) (Ma’nosi: «Allohdan o‘zga iloh yo‘qdir, U – yolg‘iz, sheriksiz zotdir. Barcha mulk va barcha hamd – faqat Unga xosdir va U har bir narsaga qodirdir»). Shunday ekan, kun bo‘yi Alloh zikrida bo‘ling, xususan, yuqoridagi zikrni ko‘p ayting. Yana, Allohga neki hojatlaringiz bo‘lsa, bugun ixlos bilan Unga iltijo qiling! Fursatni boy bermang! 📌 Izoh: Garchi yuqoridagi hadisning sanadida zaiflik bo‘lsa-da, ammo fazoil amallarda, ya’ni fazilatli amallar borasida bo‘lgan, targ‘ib ma’nosida ushbu kunlarda unga amal qilsak bo‘ladi, inshaAlloh. Undan tashqari, Arofa kuni tutilgan ro‘za ikki yillik gunohlarga kafforat bo‘ladi. Rasululloh sollallohu alayhi va sallam dedilar: «Arofa kuni tutilgan ro‘za – ham o‘tgan yilgi, ham kelgusi yilgi gunohlar uchun kafforatdir». (Muslim rivoyati) Arofa – ko‘plab jonlar do‘zaxdan ozod etiladigan kundir. Oisha roziyallohu anhodan rivoyat qilingan hadisda Rasululloh sollallohu alayhi va sallam dedilar: «Alloh taolo hech bir kunda Arofa kunidagichalik bandani do‘zaxdan ozod etmaydi. U yaqinlashib, o‘sha (do‘zaxdan ozod etilgan) bandalar bilan farishtalarga maqtanadi va: “Ular nima istashadi?!” – deb so‘raydi». (Muslim rivoyati) Ibn Abdul Barr aytadi: «Bu o‘sha bandalarning gunohi mag‘firat etilganiga ishoradir. Zero, Alloh taolo gunohkor bandalari bilan hech qachon faxrlanmaydi. Bu faqat ularning tavbalari qabul qilinib, gunohlari mag‘firat etilganidan so‘nggina bo‘lishi mumkin. Vallohu a’lam». Yana muhim bir eslatma: Sunnatga binoan, bugun, ya’ni Arofa kuni bomdod namozidan boshlab farz namozlari ketidan tashriq takbiri aytiladi. Tashriq takbirining lafzi: “Allohu Akbar, Allohu Akbar. Laa ilaaha illallohu, Vallohu Akbar, Allohu Akbar va lillahil hamd.”