Impeachment hearing ni VP Sara Duterte naantala dahil sa pahayag ni Rep. Suntay kay Anne Curtis

Pansamantalang naantala ang pagdinig ng House Justice Committee sa impeachment complaint laban kay Vice President Sara Duterte matapos ang pahayag ni Rep. Jesus “Bong” Suntay na tumukoy sa aktres na si Anne Curtis. Ginamit ni Suntay ang kanyang personal na karanasan bilang halimbawa upang igiit na hindi dapat ma-impeach si Duterte dahil sa mga pahayag nito, kabilang ang pagbanggit ni Duterte na naisip umano niyang putulin ang ulo ni Pangulong Ferdinand “Bongbong” Marcos Jr. at ang pagdeklara sa sarili bilang “designated survivor” sa isang SONA. Ayon kay Suntay "nag-init at nag-imagine" siya nang makita ang aktres sa isang hotel. Agad tumutol si San Juan Rep. Ysabel Zamora at sinabing hindi angkop ang naturang komento, lalo na sa simula ng Women’s Month. Inaprubahan ng komite ang mosyon na burahin ang pahayag sa opisyal na record. Video by House of Representatives