إلى ميثا بعمررالخمس سنين

⁨ إلى ميثا… بعمر الخمس سنوات، بعرف إنك هلّق صغيرة كتير لدرجة ما بتفهمي ليش في ناس ممكن يجرحوكي، أو ليش أوقات بتحسي إنك مختلفة عن الكل. بعرف إنك رح تبكي مرات بصمت… ورح تسألي حالك ليش الكلام القاسي بيوجع لهالدرجة. رح تمرقي بأيام تحسي فيها إنك مو كافية، وإن العالم أقسى من قلبك الصغير. بس بدي قلك سر… إنتِ أقوى بكتير مما بتتخيلي. رح يكسروا قلبك مرات. ورح تسمعي كلام يحاول يصغّرك. ورح تتعرضي لتنمر وأذى يخليكي تشكي بنفسك… بس كل مرة توقعي فيها، رح يكون في شي جواتك يرجع يوقفك من جديد. رح تكبري… ورح تتعلمي إن القوة مو إنك ما تبكي، القوة إنك تبكي… وبعدين تمسحي دموعك وتكملي. رح يصير عندك قلب متعب أحيانًا… لكنه حنون. ورح تحاولي ترضي الكل وتنسي نفسك، بس مع الوقت رح تتعلمي إن قيمتك مو بعيون الناس… قيمتك بالروح اللي جواتك. وصدقيني… كل الألم اللي رح تمري فيه، رح يحولك لامرأة ما بتنكسَر. امرأة لما الدنيا توقعها… تقوم أقوى. ولما ينطفي النور حواليها… تصير هي النور. رح يجي يوم تشوفي فيه المراية وتفهمي إن كل المعارك اللي عشتيها ما كانت لتدمرك… كانت لتبنيك. ولو في شي بدي احكيه لنسختي الصغيرة… بدي حضنك. وبدي قلك: “ما كان لازم تكبري بسرعة لتحمي حالك… كان لازم العالم يكون ألطف معك. بس رغم كل شي، أنا فخورة فيكي… لأنك بقيتي طيبة، رغم كل الأذى . وانتوا شو بدكم تحكوا لحالكم الصغيرة #نسختي_الصغيرة #ميثاعبدالجليل⁩