{الحراق}(169) Project Hail Mary إنترستيلار الغلابة

فيلم خيال علمي تاني؟ الشمس بتموت و العالم بتنتهي.. و فيه رائد فضاء بطل هاينقذ البشرية.. مش شوفنا الفيلم ده قبل كده ييجي مية مرة، ما خلاص حفظنا الأسطوانة دي، وعارفين نهايتها كمان. لا بس المرة دي الحكاية مختلفة، والفيلم بيعرف يتسحب جواك من غير ما تحس. المرة دي، بطل الفيلم.. ماهواش بطل ولا حاجة.. لا هو عسكري، ولا ملياردير عبقري، ولا بطل خارق. ده مدرس علوم في مدرسة إعدادي، كان دكتور جامعة و اترفد من شغله من سنين عشان كتب بحث .. كل المتخصصين قالوله انه غلط.. و هو أصر عليه و قالهم انهم حمير.. معقولة ده اللي هاينقذ الكوكب؟.. ازاي يعني؟ هيدي الفضائيين دروس خصوصية؟ تخيل أيوة؟!!! **** تخيل إنك تفتح عينك، تلاقي نفسك عبارة عن جثة.. جوة كيس مقفول.. كفن بلاستيك.. ولسة بتحاول تستوعب السواد اللي انت فيه ده.. ، تلاقي دراع آلي بيسحب خرطوم طويل من بقك.. تبقى بتفرفر، مش عارف إنت فين، والأهم من كل ده.. إنت مش فاكر اسمك أصلا.. دماغك سايحة تماما.. طب هو انا مت و باتحاسب دلوقت؟ و في عز ده كله.. تلاقي صوت كمبيوتر بارد.. بيسألك بكل تناحة.. "اتنين زائد اتنين يساوي كام؟". ايه ده؟.. هي مش كانت من ربك و مادينك باين؟.. بقت امتحان في حساب تانية ابتدائي؟!! الله!! هو انا مش عارف الإجابة ليه؟! هو انا لسة مادخلتش تانبية ابتدائي حتى؟ تحاول تفلفص و تهرب من دراع الروبوت ده.. جسمك مش مطاوعك ولا بيستجيب لمحاولات الحركة نهائي.. جسمك كله خدلان و منمل.. فتلاقي نفسك بتدحرج و تقع من على السرير.. و تزحف على الأرض زي الدودة.. لغاية ما تقدر تصلب نفسك و تتعكز و تمشي شوية فتلمح سراير تانية.. عليها ناس.. تقول يا فرج الله.. انا مش لوحدي الحمد لله.. تيجي تبص عليهم.. تلاقيهم جثث. ميتين.. شوية.. و تبدأ تستوعب انك لوحدك.. على سفينة فضاء.. كل اللي فيها ماتوا.. و انت الناجي الوحيد.. اسم الله عليه اسم الله عليه.. هو انا كده ابقى ناجي فعلا؟ الفيلم بيعرضلك الكابوس ده.. و لكن بشكل ألطف بكتير.. انت هاتضحك.. بس مع الوقت هاتكتشف ان الحكاية ماتضحكش أبدا.. خصوصا لما “جريس”.. بطل قصتنا.. يلاقي نفسه قدام شباك السفينة.. و قدامه سواد مالهوش آخر. الفضاء.. الفضاء ساعتها ماكانش شكله بالشاعرية اللي بنشوفها في الصور بتاعت ناسا.. لأ.. ده كان حكم إعدام بالنسبة لجريس.. بس جريس قرر ما يستسلمش.. هاياخد زمام الأمور ، يرجع بالسفينة لكوكب الأرض.. بدأ يستكشف القبر الطاير اللي هو جواه ده.. يشوف السفينة فيها وقود قد ايه.. يدور على خرايط .. يحاول يعرف موقعه ايه بالظبط في الدنيا.. عشان يحسب مسافة رحلة العودة للأرض.. عشان تطلع النتيجة ايه في الآخر؟.. رحلة العودة للأرض هاتحتاج ١١٣ سنة.. أحيه! للدعم على Patreon : https://www.patreon.com/ahmedbehiry اشترك في القناة الرسمية على تليجرام: https://t.me/ABehiry الصفحة الرسمية لاحمد بحيري علي الفيسبوك https://www.facebook.com/أحمد-بحيري-Ahmed-Behiry-109415711865636 الصفحة الرسمية علي تويتر https://twitter.com/ahmedbehiry اشترك في القناة لمتابعة الحلقات الجديدة http://goo.gl/2KheJZ المصادر: - أعلم أهل الأرض داباليو داباليو داباليو دوط قووقل دوط قوم http://www.قooقle.com