மதுரை அரசு ராஜாஜி மருத்துவமனை: ஜைக்கா கட்டிட மேற்கூரை இடிந்து விபத்து

மதுரை அரசு ராஜாஜி மருத்துவமனையில் ஜைக்கா நிதி உதவியுடன் கட்டப்பட்ட புதிய கட்டிடத்தின் மேற்கூரை திடீரென இடிந்து விழுந்து விபத்துக்குள்ளானது. மதுரை கோரிப்பாளையம் பகுதியில் சுமார் 300 கோடி ரூபாய் மதிப்பீட்டில், ஜைக்கா நிதி உதவியுடன் கட்டப்பட்ட நான்கு அடுக்குமாடி கட்டிடத்தில் தான் இந்த அதிர்ச்சி சம்பவம் நடந்துள்ளது. இன்று காலை, இந்த கட்டிடத்தின் முதல் தளத்தில் உள்ள இதயவியல் துறை நுழைவாயில் அருகே, திடீரென 'பால்ஸ் சீலிங்' எனப்படும் மேற்கூரை பகுதிகள் பெயர்ந்து கீழே விழுந்தன. இரண்டு ஆண்டுகளுக்கு முன்பு திறக்கப்பட்ட இந்த நவீன கட்டிடத்தில், இவ்வளவு சீக்கிரமாக மேற்கூரை இடிந்து விழுந்தது நோயாளிகளிடையே அதிர்ச்சியை ஏற்படுத்தியுள்ளது. விபத்து நடந்த சமயத்தில் அந்த குறிப்பிட்ட பகுதியில் நோயாளிகளோ அல்லது அவர்களது உறவினர்களோ இல்லாததால், மிகப்பெரிய உயிர்ச்சேதம் தவிர்க்கப்பட்டுள்ளது. இருப்பினும், விபத்து நடந்த இடத்திற்கு மிக அருகிலேயே இதய நோயாளிகளுக்கான உள்நோயாளி பிரிவு செயல்பட்டு வருகிறது. தரம் குறைந்த கட்டுமானமே இதற்கு காரணம் என பொதுமக்கள் குற்றம் சாட்டி வருகின்றனர். மருத்துவமனை நிர்வாகம் தற்போது அந்தப் பகுதியை சீரமைக்கும் பணியில் ஈடுபட்டுள்ளது.