ரேஸ்கோர்ஸ் விளையாட்டு மைதான கட்டிடங்கள் திறப்பு - துணை முதல்வர் உதயநிதி ஸ்டாலின்

மதுரை விளையாட்டு வீரர்களுக்கு ஒரு நற்செய்தி! சுமார் 6 கோடி ரூபாய் மதிப்பிலான புதிய விளையாட்டு வசதிகளைத் தமிழக துணை முதல்வர் உதயநிதி ஸ்டாலின் திறந்து வைத்தார். மதுரை ரேஸ்கோர்ஸ் விளையாட்டு வளாகத்தில் இந்தத் திறப்பு விழா நடைபெற்றது. இதில் கபடி மற்றும் டேபிள் டென்னிஸ் விளையாட்டுகளுக்கான பிரம்மாண்டமான பல்நோக்கு உள் அரங்கம், நவீன ஏசி வசதியுடன் கூடிய உடற்பயிற்சி கூடம் ஆகியவை மக்கள் பயன்பாட்டிற்கு வந்துள்ளன. தொடர்ந்து, சர்வதேச தரத்திலான செயற்கை இழை டென்னிஸ் ஆடுகளம் மற்றும் கூடைப்பந்து ஆடுகளங்களையும் அவர் திறந்து வைத்தார். இளைஞர் நலன் மற்றும் விளையாட்டு மேம்பாட்டுத் துறை சார்பில் இந்த நவீன உட்கட்டமைப்பு வசதிகள் ஏற்படுத்தப்பட்டுள்ளன. இந்த நிகழ்ச்சியில் அமைச்சர்கள் மூர்த்தி, பி.டி.ஆர். பழனிவேல் தியாகராஜன் மற்றும் சட்டமன்ற உறுப்பினர் கோ தளபதி உள்ளிட்ட அரசு உயர் அதிகாரிகள் பலர் பங்கேற்றனர். மதுரையின் விளையாட்டுத் தரம் இதன் மூலம் அடுத்த கட்டத்திற்கு உயரும் என எதிர்பார்க்கப்படுகிறது.