التبن ولا السيلاج .. الخلطة اللي توصّل عجول التسمين لأعلى ميزان

ندي للعجول سيلاج ولا تبن .. سؤال بيعمل خناقات بين المربيين المحترفين وكل واحد عنده سر شايفه أنه مفتاح التحويل .. النهاردة هقولك الفرق بينهم وإزاي نستخدمهم في خلطة سحرية جبارة توصّل العجل لأعلى معدل تحويل بأقل تكلفة .. ركز معايا علشان الكلام ده بفلوس . نبدأ بالتبن وخصوصاً تبن القمح، ده اللي بنسميه "العلف الماليء". قيمته الغذائية مش عالية أوي، بس وظيفته جبارة. ليه بنحتاجه؟ التبن بيعمل "هيكل" للأكل جوه الكرش، بيخلي العجل يجتر ويفرز لعاب، وده بيمنع الحموضة اللي ممكن تموت العجل. بس خلي بالك من الغلطة اللي بنقع فيه.. في ناس بتملى الطوالة تبن .. والعجل لما ياكل تبن كتير، بطنه بتتملي هوا، ومبيقدرش ياكل "العلف المركز" اللي فيه البروتين. الكمية الصح .. هنضيف من كيلو لـ كيلو ونص الصبح، وزيهم بالليل. يعني آخره 3 كيلو في اليوم للعجل الكبير، ولو زاد عن كدة؟ أنت كدة بتخسر تحويل وبتدفع فلوس في "تبن" مش هيديك لحم. نيجي بقى للسلاج.. ده ملوك التسمين بيسموه "العلف المحفوظ".. لو معمول صح (ذرة بالكوز بتاعها)، فأنت عندك منجم طاقة وبروتين. الميزة في السيلاج إنه سهل الهضم وبيفتح الشهية، وبيرطب على قلب العجل في الحر. بس في حاجة مهمة لازم ناخد بالنا منه .. السيلاج فيه نسبة رطوبة عالية (مية)، فلو بدلت كيلو تبن بكيلو سيلاج، أنت كدة بتجوع العجل.. القاعدة بتقول: كيلو تبن = 3 كيلو سلاج عشان تعوض المية اللي فيه. وكمان لازم نحذر من خطر الحموضة .. لو قدمت كمية كبيرة فجأة، حموضة الكرش هتعلى، والعجل "هيقفل" أكل وهتلاقي تحويله وقف. وصلنا كدة للخلطة السحرية .. أحسن نظام في المزارع الكبيرة هو "التوازن". في الأوزان الكبير.. هنعمل خليك في الوسط. ثلث سيلاج وثلثين تبن مع العليقة المركزة. وفي التسمين كلمة السر في التدريج .. لو عايز تنقل من تبن لسيلاج، خد أسبوع كامل بتدخل السيلاج واحدة واحدة عشان "البكتيريا" اللي في الكرش تتعود عليه. ونصيحة أرض الخير .. لو السلاج بتاعك "مزز" أو ريحته نفاذة أوي، ضيف معلقة "بيكربونات صوديوم" على العلف عشان تعادل الحموضة وتحمي العجل. في النهاية، العجل هو اللي بيقولك إيه الصح.. عينه، لمعة شعره، ونشاطه على الطوالة هم الميزان الحقيقي. مفيش نظام واحد يمشي على كل المزارع، التجربة والمتابعة اليومية هي اللي بتصنع المربي الشاطر. لو عجبك الفيديو واستفدت منه، متنساش تعمل لايك وشاركنا في التعليقات: أنت شغال بالسيلاج ولا بالتبن؟ ومعدل التحويل عندك واصل لكام .