Dhameystirka dastuurkii lagu muransanaa oo la ansixiyay

Xildhibaanada labada aqal ee Baarlamaanka Federaalka Soomaaliya ayaa maanta si aqlabiyad leh u ansixiyay wax ka beddelka iyo dhameystirka dastuurka dalka, kaas oo ka kooban 15 cutub. Tallaabadan ayaa loo arkaa mid muhiim u ah geeddi-socodka dib-u-habeynta iyo xoojinta hay’adaha dowliga ah. Si dastuurka loo meel mariyo waxaa loo baahnaa saddex meelood labo meel codadka Golaha Shacabka, oo u dhiganta 184 xildhibaan, iyo saddex meelood labo meel Aqalka Sare, oo u dhiganta 36 sanatar. Xildhibaanadii iyo sanataradii maanta soo xaadiray ayaa dhammaantood u codeeyay ansixinta, sida uu ku dhawaaqay Guddoomiyaha Golaha Shacabka, Aadan Maxamed Nuur.