Board of Peace အတွက် အမေရိကန်က ၁၀ ဘီလီယံ ထည့်ဝင်မယ်လို့ ထရမ့်ပြော

Board of Peace အတွက် အဖွဲ့ဝင်နိုင်ငံတွေဆီက ဒေါ်လာ ၇ ဘီလီယံရရှိပြီး အမေရိကန်က ၁၀ ဘီလီယံ ထည့်ဝင်မယ်လို့ ထရမ့်ပြော ------------------ ဖေဖော်ဝါရီ ၁၉ ရက်နေ့က အမေရိကန်နိုင်ငံ ဝါရှင်တန်မြို့မှာ ပြုလုပ်ခဲ့တဲ့ Board of Peace အဖွဲ့ရဲ့ ပထမဆုံး အစည်းအဝေးမှာ ဂါဇာပြန်လည်ထူထောင်ရေး ရန်ပုံငွေအတွက် အဖွဲ့ဝင်နိုင်ငံတွေဆီက အမေရိကန်ဒေါ်လာ ၇ ဘီလီယံရရှိခဲ့ပြီး အမေရိကန်နိုင်ငံအနေနဲ့လည်း ၁၀ ဘီလီယံ ထည့်ဝင်သွားမယ်လို့ ထရမ့်က ကတိပြုခဲ့ပါတယ်။ ဒီအစည်းအဝေးကိုတော့ အမေရိကန်အစိုးရက Donald J. Trump U.S. Institute of Peace လို့ အမည်ပေးထားတဲ့ အဆောက်အအုံမှာ ကျင်းပခဲ့ပြီး ဒေါ်နယ်ထရမ့်က အဖွင့်မိန့်ခွန်း ပြောကြားခဲ့ကာ ရရှိမယ့် ရန်ပုံငွေတွေကို Board of Peace ကပဲ စီမံခန့်ခွဲသွားမှာ ဖြစ်တယ်လို့ ပြောပါတယ်။ ဒါ့အပြင် ဒီအဖွဲ့ဟာ သမိုင်းမှာ အဖွဲ့ဝင်အင်အား အတောင့်တင်းဆုံး ဘုတ်အဖွဲ့ဖြစ်ပြီး ဂါဇာပြည်သူတွေ၊ အရှေ့အလယ်ပိုင်းနဲ့ တစ်ကမ္ဘာလုံးက လူတွေအတွက် ပိုမိုတောက်ပတဲ့ အနာဂတ်တစ်ခု ရရှိစေဖို့ အတူတူ ပူးပေါင်းဆောင်ရွက်ကြတာ ဖြစ်တယ်လို့လည်း ထရမ့်က ပြောပါတယ်။ ------------------------------------------- Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် https://myanmar-now.org/mm/members/ တွင် ကူညီနိုင်ပါသည်။