Պռոշյանում 45 տարի անց կրկին հավաքվեցին դասընկերները՝ հիշելով իրենց լեգենդար հերոսներին

Այսօր՝ հունիսի 13-ին, Կոտայքի մարզի Պռոշյան գյուղում 1980-1981 թվականների շրջանավարտները նշում էին դպրոցն ավարտելու 45-ամյակը։ Միջոցառումն առանձնահատուկ խորհուրդ ուներ, քանի որ, ինչպես Oragir.News-ի հետ զրույցում նշեց Պռոշյանի Պետրոս Ղևոնդյանի անվան միջնակարգ դպրոցի հայոց լեզվի և գրականության ուսուցչուհի Մարիամ Պետրոսյանը, այդ օրը հիշատակի և խոնարհման օր էր նաև իրենց զուգահեռ դասարանում սովորած, Արցախյան ազատամարտի մասնակից, ԼՂՀ «Մարտական խաչ» առաջին աստիճանի և ՀՀ «Մարտական ծառայություն» երկրորդ աստիճանի շքանշանների ասպետ Կարոտ Մկրտչյանի համար, ով այդ օրը մղել էր իր վերջին մարտը։ Պետրոսյանի խոսքով՝ միջոցառումը բավականին ընդգրկուն էր։ Հրավիրված էին ոչ միայն շրջանավարտները, այլև նրանց ընտանիքի անդամները, հարազատները, նախկին ուսուցիչները, որոնցից, ցավոք, այսօր քչերն են մնացել, ինչպես նաև 44-օրյա պատերազմում զոհված հերոսների ընտանիքների ներկայացուցիչներ։ Շրջանավարտ Վաչիկ Բաղդասարյանը խոսեց Կարոտ Մկրտչյանի և դպրոցի անվանակիր Պետրոս Ղևոնդյանի անցած ուղու և նրանց թողած ժառանգության մասին։ Միջոցառման ընթացքում հուզիչ ելույթ ունեցավ նաև շրջանավարտ Քնարիկ Հակոբյանը, ով դժվարությամբ էր զսպում հույզերը՝ հիշելով իր սիրելի դասընկերներին։ Շրջանավարտ Հովհաննես Ավետիսյանը, որը մասնակցել է Արցախի բոլոր պատերազմներին, ընդգծեց, որ չափազանց կարևոր է հիշել և արժևորել այն հերոսներին, որոնց կողքին ապրել ու որոնց ճանաչելու պատիվ են ունեցել։ Նրա խոսքով՝ յուրաքանչյուրի պարտքն է անել ամեն հնարավորը, որպեսզի նրանց սկսած գործը կիսատ չմնա։ Ընկերների սխրագործությունների մասին խոսելիս Ավետիսյանը հիշեց նաև իր համադասարանցու՝ հրամանատար, Արցախի հերոս Պետրոս Ղևոնդյանի խոսքերը։ Ամփոփելով խոսքը՝ Հովհաննես Ավետիսյանը մտահոգություն հայտնեց ազգային հերոսների կերպարի և նրանց կատարած սխրանքների արժևորման նվազման առնչությամբ։ Նրա համոզմամբ՝ տարիներ շարունակ տարվող քաղաքականության հետևանքով այդ արժեքները մղվել են երկրորդ պլան։ Ավետիսյանը նաև ընդգծեց, որ հայ հասարակության մեջ չպետք է լինեն բաժանարար գծեր՝ հատկապես արցախցիների և Հայաստանի մյուս բնակիչների միջև, քանի որ բոլոր հայերը մեկ ամբողջություն են։ Մանրամասները՝ https://oragir.news/hy/material/2026/06/13/198884 Oragir.News-ին կարող եք հետևել նաև. Telegram - https://t.me/oragir_news Facebook - https://www.facebook.com/oragir1 Facebook - https://www.facebook.com/Oragir.am Instagram - https://www.instagram.com/oragir.news Tiktok - https://www.tiktok.com/@oragir.news