លោក ស សុខាប្រកាសដាក់ជនបង្កគ្រោះថ្នាក់ចរាចរណ៍នៅបាត់ដំបងក្នុងបញ្ជីខ្មៅ និងបិទគណនីធនាគារ

លោក ស សុខា រដ្ឋមន្ត្រីក្រសួងមហាផ្ទៃបានស្នើឲ្យស្នងការខេត្តបាត់ដំបង និងអគ្គស្នងការនគរបាលជាតិធ្វើការឲ្យសកម្មជុំវិញចំណាត់ការលើអ្នកបើកបររថយន្តដែលបង្កឲ្យមានគ្រោះថ្នាក់ចរាចរណ៍បណ្តាលឲ្យមានមនុស្សស្លាប់រហូតដល់ទៅ ៦នាក់ នៅក្នុងស្រុកមោងឬស្ស៊ី ខេត្តបាត់ដំបង។ ជនសង្ស័យដែលបានបង្កគ្រោះថ្នាក់ចរាចរណ៍ដ៏កក្រើកមួយនេះត្រូវគេស្គាល់ថាជាកូនប្រុសរបស់មន្ត្រីនគរបាលមួយរូបនៃស្នងការដ្ឋាននគរបាលខេត្តបន្ទាយមានជ័យ។ ស្របពេលដែលមានការអំពាវនាវឲ្យអាណាព្យាបាលនាំកូនមកទទួលខុសត្រូវ រដ្ឋមន្ត្រីក្រសួងមហាផ្ទៃក៏បានចាត់វិធានការសំខាន់ៗមួយចំនួន ដូចជាដាក់ក្នុងបញ្ជីខ្មៅ មិនឲ្យឆ្លងកាត់ព្រំដែន បិទគណនីធនាគារ និងការដាក់ទណ្ឌកម្មមួយចំនួនទៀត។  សូមរម្លឹកថា កាលពីថ្ងទី២៧ ខែមីនា ឆ្នាំ២០២៦ មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅលើផ្លូវជាតិលេខ៥ ត្រង់ចំណុចស្រុកមោងឬស្សី ខេត្តបាត់ដំបង បង្កឡើងដោយរថយន្ត MERCEDES ទំនើបមួយគ្រឿង ដែលមានផ្លាកលេខ C.S.168។ គ្រោះថ្នាក់មួយនេះកាលណោះបានបណ្តាលឲ្យស្លាប់មនុស្សប្រុស ស្រី ក្មេង ចាស់ សរុបចំនួន ៦នាក់ ក្នុងនោះរាប់ទាំងកូនក្នុងផ្ទៃផងដែរ។ ចំណាត់ការរបស់រដ្ឋមន្ត្រីក្រសួងមហាផ្ទៃពេលនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែតចេញបញ្ជានៅថ្ងៃទី៣១ មីនានេះ ឲ្យលោក កើត រិទ្ធ រដ្ឋមន្ត្រីក្រសួងយុត្តិធម៌ និងលោក ស ថេត អគ្គស្នងការនគរបាលជាតិធ្វើការស្រាវជ្រាវឲ្យបានហ្មត់ចត់បំផុត និងរកឲ្យឃើញអ្នកដែលបើកបររថយន្តពិតប្រាកដដែលបានបុកមនុស្សស្លាប់ទាំង ៦នាក់ និងត្រូវអនុវត្តច្បាប់ឲ្យបានម៉ឺងម៉ាត់ដើម្បីផ្ដល់យុត្តិធម៌ដល់ជនរងគ្រោះ៕ #ចរាចរណ៍ #សន្តិសុខ #សង្គម 🔔 Please subscribe: https://rfi.my/YTkm 🌍 ទទួល​​ព័ត៌មាន​នៅ​ជុំវិញពិភពលោក​ដោយ​ផ្ទាល់ https://www.rfi.fr/km/ ភ្ជាប់ជាមួយ​ហ្វេសប៊ុក​របស់​យើង https://rfi.my/FBkm ទទួលព័ត៌មានពី​យើង​តាម​​ X https://rfi.my/Xkm ទទួលព័ត៌មានតាមអ៊ីនស្តាក្រាម https://rfi.my/IGkm ទទួលព័ត៌មាន​តាម​តេឡេក្រាម https://rfi.my/TGkm និង WhatsApp https://rfi.my/WAkm ទទួលព័ត៌មានតាមទិកតុក https://rfi.my/TKkm