പേരാവൂരില്‍ ജയിച്ച ഒരേയൊരു ഇടത് സ്ഥാനാര്‍ഥി; സണ്ണി ജോസഫിനെ നേരിടാന്‍ കെ.കെ ശൈലജ

2021 മെയ് രണ്ട്, സംസ്ഥാനത്തെങ്ങും ഇടത് അനുകൂലതരംഗം ആഞ്ഞുവീശുകയാണ്. കണ്ണൂരിലെ ഇടത് സ്ഥാനാര്‍ഥികള്‍ ഒന്നൊന്നായി വോട്ടെണ്ണല്‍ കേന്ദ്രങ്ങളില്‍നിന്ന് വിജയശ്രീലാളിതരായി മടങ്ങുന്നു. മുന്നണികളുടെ നെഞ്ചിടിപ്പേറ്റുന്നതായിരുന്നു യുഡിഎഫ് സിറ്റിങ് സീറ്റായ പേരാവൂരിലെ വോട്ടെണ്ണല്‍. വോട്ടണ്ണലിന്റെ തുടക്കംമുതല്‍ ലീഡുകള്‍ മാറിമറിഞ്ഞു. ഒരു അട്ടിറിയുണ്ടാകുമെന്ന പ്രതീക്ഷയിലായിരുന്നു എല്‍ഡിഎഫ് ക്യാമ്പ് അവസാനം വരെ. ഒടുവില്‍ 3352 വോട്ടിന്റെ ഭൂരിപക്ഷത്തിന് പേരാവൂരില്‍ അഡ്വ.സണ്ണി ജോസഫ് ഹാട്രിക് തികച്ചു. സിറ്റിങ് എംഎല്‍എ ആയിരുന്ന കെ.കെ.ശൈലജയെ 2011-ല്‍ തറപ്പറ്റിച്ചാണ് സണ്ണി ജോസഫ് പേരാവൂരില്‍ ജൈത്രയാത്ര തുടങ്ങിയത്. 15 വര്‍ഷം മുമ്പ് കൈവിട്ട സീറ്റ് തിരിച്ച് പിടിക്കാന്‍ ശൈലജയെ തന്നെ രംഗത്തേക്കിറക്കാനുള്ള നീക്കത്തിലാണ് സിപിഎം. 15 വര്‍ഷത്തിനിപ്പുറം ഇരുവരും വീണ്ടും മുഖാമുഖം വരുമ്പോള്‍ ഒരാള്‍ കെപിസിസി അധ്യക്ഷനും മറ്റൊരാള്‍ സിപിഎമ്മിന്റെ കരുത്തുറ്റ മുഖങ്ങളിലൊരാളുമാണ്. 2021-ല്‍ മട്ടന്നൂരില്‍ മത്സരിച്ച് വന്‍ ഭൂരിപക്ഷം നേടിയ ശൈലയ്ക്ക് പാര്‍ട്ടിക്കപ്പുറമുള്ള വോട്ടുകള്‍ സമാഹരിക്കാനാകുമെന്ന പ്രതീക്ഷയിലാണ് പേരാവൂരിലേക്ക് പരിഗണിക്കുന്നത്. മാത്രമല്ല കുടിയേറ്റ കര്‍ഷകര്‍ ഏറെയുള്ള യുഡിഎഫ് ചായ്വ് അല്‍പം കൂടുതലുള്ള പേരാവൂരില്‍ നിന്ന് ജയിച്ചുകയറിയ ഒരേ ഒരു സിപിഎം നേതാവെന്ന പേരും ശൈലജയ്ക്ക് അവകാശപ്പെട്ടതാണ്. അതുകൊണ്ടുതന്നെ 2021-ല്‍ പേരാവൂരില്‍ വിയര്‍ത്തു ജയിച്ച സണ്ണി ജോസഫ് ശൈലജയ്ക്ക് മുന്നില്‍ വീഴുമെന്ന ഉറച്ച പ്രതീക്ഷയിലാണ് ഇടതുപക്ഷം. ഇരിട്ടി മുനിസിപ്പാലിറ്റിയും ആറളം, അയ്യന്‍കുന്ന്, കണിച്ചാര്‍, കേളകം, കൊട്ടിയൂര്‍, മുഴക്കുന്ന്, പായം, പേരാവൂര്‍ പഞ്ചായത്തുകളും ഉള്‍പ്പെടുന്നതാണ് പേരാവൂര്‍ മണ്ഡലം. Click Here to free Subscribe: https://bit.ly/mathrubhumiyt Stay Connected with Us Website: https://www.mathrubhumi.com/ Facebook- https://www.facebook.com/mathrubhumidotcom/ Twitter- https://twitter.com/mathrubhumi?lang=en Instagram- https://www.instagram.com/mathrubhumidotcom/ Telegram: https://t.me/mathrubhumidotcom Whatsapp: https://www.whatsapp.com/channel/0029Va4t1Y59xVJfh11qY12p #kkshailaja #sunnyjoeseph