{تعاشب شاي}(2392) هل أنا اللي خلقت نفسي؟

العيد في مصر مابقاش مجرد مناسبة دينية أو فرصة ناكل كحك لحد ما يجيلنا ارتجاع في المريء. العيد على السوشيال ميديا اتحول لـ "لجنة تفتيش" مجتمعية، وكلنا بلا استثناء بقينا شركات علاقات عامة صغيرة. الأب بيلبس قميص زارا الضيق عشان يبان شباب ويشفط بطنه، والأم بتسرح للعيال بالعافية وتلزق شعرهم، وإحنا بنقف قدام أي نافورة أو حيطة نظيفة عشان ناخد "الصورة المثالية". الصورة اللي هننزلها على فيسبوك وإنستجرام عشان نثبت لقرايبنا والإكس والناس اللي مابنكلمهمش من إعدادي إننا أسرة سعيدة مفيش في حياتنا غلطة. الكومنتات بتبقى قلوب حمرا و"ربنا يخليكم لبعض"، في مسرحية متعودين عليها كلنا.. وسط المسرحية البلاستيك دي، بيطلع واحد يقرر مايلعبش معانا... أول يوم العيد.. مواطن مصري بسيط اسمه محمد حسن الشيخ، نزل صورة عائلية. محمد ماجابش مصور محترف، ولا شفط بطنه، ولا دور على كادر مثالي. الراجل نزل صورة حقيقية جداً مع عياله اللي ربنا خلقهم من ذوي الإعاقة. راجل بيحتفل بالعيد مع حتة من قلبه، وكتب كابشن بسيط طالع من أب مصري شقيان: "جبر الخواطر على الله.. كل عام وأنتم بخير". في أي مجتمع طبيعي، الخوارزمية بتلم للراجل ده شوية قلوب حمرا، على كام تعليق زي ربنا يخليهوملك يا أبو حميد، والقصة بتخلص. لكن إحنا مش مجتمع طبيعي يا جماعة، إحنا مجتمع بياكل في بعضه. بعد دقايق بالظبط، البوست ماتحولش لساحة معايدة، ده اتحول لمجزرة إلكترونية. حفلة سلخ جماعي في ميدان عام ديجيتال. الناس سابت العيد والكحك، وسنت سكاكينها ونزلت تقطيع في عيال الراجل. سخرية، واستهزاء و سف على شكلهم و على وجودهم في الحياة أصلا... العيال اللي كانت طالعة تفرح وتتصور بهدوم العيد زي أي أطفال، فجأة بقوا أهداف متحركة لغزوة من الدبابير الإلكترونية اللي بتدور على أي صيدة على النت... الراجل مقدرش يستحمل. مسح الصورة؟ الإنترنت مابينساش، السكرين شوتس اتوزعت على مئات الجروبات عشان الناس تكمل ضحك. محمد طلع في فيديو، راجل كبير بيبكي بحرقة وهو بيسأل المجتمع سؤال بيختصر كل الخراب النفسي اللي إحنا فيه: "قولولي إيه الغريب فيا؟ هل عيالي دول مالهمش نصيب في الحياة؟". الكلمتين دول مش عتاب، دي محاكمة. ده راجل بيكشف عورة مجتمع عامل نفسه متدين وبتاع ربنا، بس أول ما بيشوف حد أضعف منه بيطلع سكينة ويدبحه. للدعم على Patreon : https://www.patreon.com/ahmedbehiry اشترك في القناة الرسمية على تليجرام: https://t.me/ABehiry الصفحة الرسمية لاحمد بحيري علي الفيسبوك https://www.facebook.com/أحمد-بحيري-Ahmed-Behiry-109415711865636 الصفحة الرسمية علي تويتر https://twitter.com/ahmedbehiry اشترك في القناة لمتابعة الحلقات الجديدة http://goo.gl/2KheJZ المصادر: - أعلم أهل الأرض داباليو داباليو داباليو دوط قووقل دوط قوم http://www.قooقle.com