தேசிய ஜனநாயக கூட்டணி கட்சி செயல் வீரர்களின் ஆலோசனைக் கூட்டம்

தமிழகத்தில் தேர்தல் களம் சூடுபிடித்துள்ள நிலையில், விருதுநகரில் அதிமுக மற்றும் அதன் கூட்டணி கட்சி நிர்வாகிகள் பங்கேற்ற முக்கிய ஆலோசனைக் கூட்டம் இன்று நடைபெற்றது. விருதுநகர் சரஸ்வதி மகாலில் நடைபெற்ற இந்தச் செயல் வீரர்கள் கூட்டத்திற்கு, அதிமுக மேற்கு மாவட்ட அவைத்தலைவர் வழக்கறிஞர் விஜயகுமரன் தலைமை தாங்கினார். இதில் சிறப்பு அழைப்பாளராகப் பங்கேற்ற அதிமுக மேற்கு மாவட்ட முன்னாள் செயலாளரும், முன்னாள் அமைச்சருமான ரமணா. கட்சித் தொண்டர்களிடையே உரையாற்றினார். இந்தக் கூட்டத்தில், விருதுநகர் சட்டமன்றத் தொகுதி அதிமுக வேட்பாளர் கணேசன் அவர்கள் அதிகாரப்பூர்வமாக அறிமுகம் செய்து வைக்கப்பட்டார். வேட்பாளரின் வெற்றிக்காகத் தொண்டர்கள் அனைவரும் ஒற்றுமையுடன் பாடுபட வேண்டும் என்றும், எடப்பாடி பழனிசாமி அவர்களை மீண்டும் முதல்வராக்க அயராது உழைக்க வேண்டும் என்றும் நிர்வாகிகளுக்கு அறிவுறுத்தப்பட்டது. தேர்தல் பணிகளை எவ்வாறு மேற்கொள்வது என்பது குறித்த ஆலோசனைகள் வழங்கப்பட்ட இக்கூட்டத்தில், அதிமுகவின் மாவட்ட, நகர மற்றும் ஒன்றிய நிர்வாகிகள் திரளாகக் கலந்து கொண்டனர்.