Umbakıda körpü bir ildə ikinci dəfə dağılıb

Bakının Qaradağ rayonunun Umbakı qəsəbəsi yaxınlığında Ceyrankeçməz çayı üzərindəki körpü ətrafında vəziyyət yenidən kritikdir. Sakinlərin sözlərinə görə, ötən il seldən dağılan körpünün yerində salınmış müvəqqəti keçid də son yağışlardan sonra yenidən su altında qalıb və yararsız hala düşüb. Beləliklə, eyni ərazidə iki dəfə sel olub, iki dəfə də körpü çöküb. Nəticədə iki sahil arasında gediş-gəliş kəsilib. Bəzi sakinlər isə həyatlarını riskə ataraq qarşı sahilə boru xətti ilə keçməyə məcbur qalırlar. Azərbaycan Avtomobil Yolları Dövlət Agentliyindən yerli mediaya verdiyi məlumata əsasən, suyun səviyyəsi aşağı düşəndən sonra müvəqqəti yol yenidən bərpa olunacaq. Ancaq sakinlər üçün əsas sual dəyişmir: niyə bir il ərzində körpü iki dəfə dağılır?