ОИЛАВИЙ ФИРИБГАРЛИК: “SURKHAN AUTOCENTER” ИШИ БЎЙИЧА ЯНГИ ТАФСИЛОТЛАР МАЪЛУМ БЎЛДИ

Сурхондарё вилояти ИИБ ҳузуридаги Тергов бошқармаси томонидан “Surkhan Autocenter” МЧЖ таъсисчиси Тўраев Акмал Ахмед ўғли ва бошқаларга нисбатан қўзғатилган жиноят иши бўйича тергов ҳаракатлари давом этмоқда. Маълум қилинишича, жиноят иши 2025 йил 29 декабрь куни Жиноят кодексининг 168-моддаси 4-қисми “а” банди билан қўзғатилган. Тергов материалларига кўра, Тўраев Акмал Ахмед ўғли автомобил ишлаб чиқарувчи корхоналар билан тўғридан-тўғри шартномага эга бўлмаган ҳолда, фуқаролардан янги автомашина учун турли миқдорда пул маблағларини қабул қилган. Шу билан бирга, мижозларга шартномалар тақдим этилган бўлса-да, белгиланган муддатларда автомобиллар етказиб берилмаган. Дастлабки ҳисоб-китобларга кўра, мазкур ҳолатдан жабр кўрган фуқаролар сони қарийб 700 нафарни ташкил этмоқда. Уларнинг аксар қисми сўроқ қилиниб, жабрланувчи сифатида эътироф этилган. Тергов жараёнида аниқланишича, Тўраев Акмал Ахмед ўғли ўз жиноий ҳаракатларини оила аъзолари кўмагида амалга ошириб келган. Хусусан, унга опаси Раджабова М., турмуш ўртоғи Қўлдошева М. ва қайинсинглиси Парданазарова М. фаол кўмак бергани қайд этилган. Шунга кўра, Тўраев Акмал Ахмед ўғли, Раджабова М., Қўлдошева М., Парданазарова М. ҳамда Эшмуродов Н.га нисбатан Жиноят кодексининг 168-моддаси ва бошқа моддалари билан айблов эълон қилиниб, уларнинг барчасига қамоқ эҳтиёт чораси қўлланган. Расмийларга кўра, иш ҳажмининг катталиги ва жабрланганлар сонининг кўплиги сабабли тергов ҳаракатлари давом этмоқда. Шунингдек, фуқаролардан ижтимоий тармоқларда тарқалаётган асоссиз хабарларга ишонмаслик ва тергов натижаларини кутиш сўралган. Ҳолат бўйича ҳали терговга келиб кўрсатма бермаган фуқаролардан шахсини тасдиқловчи ҳамда ишга оид ҳужжатлар билан Сурхондарё вилояти ИИБ ҳузуридаги Тергов бошқармасига мурожаат қилиш сўралган. Айни пайтда жабрланганлардан аризалар келиб тушиши давом этмоқда.