အရှေ့အလယ်ပိုင်းဒေသတည်ငြိမ်အေးချမ်းမှု ပြန်လည်ဖော်ဆောင်ရေးအဆိုပြုချက် တရုတ်နှင့်ပါကစ္စတန်ကြေညာ#China

တရုတ်နိုင်ငံနှင့် ပါကစ္စတန်နိုင်ငံတို့ ပါရှန်းပင်လယ်ကွေ့ဒေသနှင့် အရှေ့အလယ်ပိုင်းဒေသ တည်ငြိမ်အေးချမ်းမှု ပြန်လည်ဖော်ဆောင်ရေးအတွက် အချက်ငါးချက်ပါဝင်သော အဆိုပြုချက် ထုတ်ပြန်ကြေညာ ပေကျင်း၊ ဧပြီ ၂ ရက် (ဆင်ဟွာ) တရုတ်နိုင်ငံ ပေကျင်းမြို့တွင် မတ် ၃၁ ရက်က တရုတ်နိုင်ငံခြားရေးဝန်ကြီး ဝမ်ရိနှင့် ပါကစ္စတန် ဒုတိယဝန်ကြီးချုပ်နှင့် နိုင်ငံခြားရေးဝန်ကြီး မိုဟာမက် အီရှက်ဒါတို့ တွေ့ဆုံဆွေးနွေးစဉ်အတွင်း ပါရှန်းပင်လယ်ကွေ့နှင့် အရှေ့အလယ်ပိုင်းဒေသ တည်ငြိမ်အေးချမ်းမှုကို ပြန်လည်ဖော်ဆောင်ရေးအတွက် အချက်ငါးချက်ပါဝင်သော အဆိုပြုချက်ကို တရုတ်နိုင်ငံနှင့် ပါကစ္စတန်နိုင်ငံတို့က ထုတ်ပြန်ကြေညာခဲ့ကြောင်း သိရသည်။ အဆိုပါ ဆွေးနွေးပွဲ၌ တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင်လည်းဖြစ်သူ ဝမ်နှင့် ဒါတို့က ပါရှန်းပင်လယ်ကွေ့နှင့် အရှေ့အလယ်ပိုင်းဒေသ အခြေအနေတို့ကို ပြန်လည်သုံးသပ်ခဲ့သည်။ နှစ်ဖက်အနေဖြင့် အောက်ပါအဆိုပြုချက်များကို အဆိုပြုခဲ့သည်။ ပထမ အဆိုပြုချက်မှာ တိုက်ခိုက်မှုများကို ချက်ချင်းရပ်တန့်ရေးပင်ဖြစ်သည်။ ပဋိပက္ခ ပိုမိုကျယ်ပြန့်မလာအောင် တားဆီးရေးအတွက် အစွမ်းကုန် ကြိုးပမ်းအားထုတ်ကြရန်နှင့် တိုက်ခိုက်မှုများကို ချက်ချင်းရပ်တန့်ရန် တရုတ်နိုင်ငံနှင့် ပါကစ္စတန်နိုင်ငံတို့က တိုက်တွန်းထားသည်။ စစ်ဒဏ်သင့် နေရာအားလုံးသို့ လူသားချင်းစာနာမှု အကူအညီများကို ခွင့်ပြုရမည်ဖြစ်သည်။ ဒုတိယအဆိုပြုချက်မှာ ငြိမ်းချမ်းရေးဆွေးနွေးမှုများကို တတ်နိုင်သမျှ အဆောလျင်ဆုံး စတင်ရေးပင်ဖြစ်သည်။ အီရန်နိုင်ငံနှင့် ပင်လယ်ကွေ့နိုင်ငံများ၏ အချုပ်အခြာအာဏာ၊ နယ်မြေပိုင်နက်ပြည့်စုံမှု၊ လွတ်လပ်မှုနှင့် လုံခြုံမှုတို့ကို ကာကွယ်ထိန်းသိမ်းရမည်ဖြစ်သည်။ ပဋိပက္ခများကို ဖြေရှင်းရာတွင် တွေ့ဆုံဆွေးနွေးမှုနှင့် သံတမန်နည်းလမ်းသည်သာလျှင် တစ်ခုတည်းသော အလားအလာရှိသည့် နည်းလမ်းဖြစ်သည်။ တရုတ်နိုင်ငံနှင့် ပါကစ္စတန်နိုင်ငံတို့အနေဖြင့် သက်ဆိုင်ရာနိုင်ငံများ ဆွေးနွေးမှုများ စတင်ရေးအတွက် ထောက်ခံအားပေးလျက်ရှိကာ သက်ဆိုင်ရာနိုင်ငံအားလုံးအနေဖြင့် ပဋိပက္ခများကို ငြိမ်းချမ်းစွာဖြေရှင်းရေး၊ ငြိမ်းချမ်းရေး ဆွေးနွေးစဉ်အတွင်း လက်နက်အင်အားသုံးခြင်းကိုလည်းကောင်း၊ အင်အားသုံးမည်ဟု ခြိမ်းခြောက်ခြင်းကိုလည်းကောင်း ရှောင်ကြဉ်ရေးအတွက် ကတိကဝတ်ပြုရမည်ဖြစ်သည်။ တတိယအချက်မှာ စစ်ရေးနှင့်မသက်ဆိုင်သော နေရာများ၏ လုံခြုံရေးပင်ဖြစ်သည်။ စစ်ရေးပဋိပက္ခအတွင်း အရပ်သားများကို အကာအကွယ်ပေးရမည်ဟူသော မူဝါဒကို လိုက်နာကျင့်သုံးရမည်ဖြစ်သည်။ ပဋိပက္ခနှင့် သက်ဆိုင်သည့် နိုင်ငံများအနေဖြင့် အရပ်သားများအား တိုက်ခိုက်ခြင်း၊ စစ်ရေးနှင့်မသက်ဆိုင်သော နေရာများအား ပစ်မှတ်ထားတိုက်ခိုက်ခြင်းတို့ကို ချက်ချင်းရပ်တန့်ရန်၊ နိုင်ငံတကာ လူသားချင်းစာနာမှုဆိုင်ရာ ဥပဒေကို အပြည့်အဝလိုက်နာရန်၊ စွမ်းအင်၊ ရေသန့်စင်ခြင်းနှင့် ဓာတ်အားဖြန့်ဖြူးရေး အဆောက်အအုံများ စသည့် အရေးကြီး အခြေခံအဆောက်အအုံများအပြင် နျူကလီးယား ဓာတ်အားပေးစက်ရုံကဲ့သို့သော အရပ်ဘက်သုံး နျူကလီးယားဆိုင်ရာ အခြေခံအဆောက်အအုံများအား တိုက်ခိုက်ခြင်းကို ရပ်တန့်ရန် တရုတ်နိုင်ငံနှင့် ပါကစ္စတန်နိုင်ငံတို့က တိုက်တွန်းလိုက်သည်။ စတုတ္ထအချက်မှာ ရေကြောင်းသယ်ယူပို့ဆောင်ရေး လမ်းကြောင်းများ၏ ဘေးကင်းလုံခြုံမှုပင်ဖြစ်သည်။ ဟော်မုဇ်ရေလက်ကြားနှင့် ယင်းနှင့်ဆက်စပ်နေသော ရေပြင်နယ်နိမိတ်များသည် ကုန်စည်နှင့် စွမ်းအင်အတွက် အရေးပါသော ကမ္ဘာလုံးဆိုင်ရာ ရေကြောင်းသယ်ယူပို့ဆောင်ရေး လမ်းကြောင်းတစ်ခုဖြစ်သည်။ သက်ဆိုင်ရာနိုင်ငံများအနေဖြင့် ဟော်မုဇ်ရေလက်ကြားတွင် သောင်တင်နေသည့် သင်္ဘောများနှင့် သင်္ဘောသားများ၏ ဘေးကင်းလုံခြုံမှုအတွက် အကာအကွယ်ပေးရေး၊ အရပ်ဘက်နှင့် ကုန်စည်သယ်ယူပို့ဆောင်ရေး သင်္ဘောများ ဆောလျင်စွာနှင့် ဘေးကင်းစွာ ဖြတ်သန်းသွားလာခွင့်ပြုရေး၊ အဆိုပါ ရေလက်ကြားမှ ပုံမှန်ဖြတ်သန်းသွားလာမှုများ မူလအခြေအနေသို့ အမြန်ဆုံးပြန်လည်ရောက်ရှိရေးအတွက် တရုတ်နိုင်ငံနှင့် ပါကစ္စတန်နိုင်ငံတို့က တိုက်တွန်းလိုက်သည်။ ပဉ္စမအချက်မှာ ကုလသမဂ္ဂ ပဋိညာဉ်စာတမ်း၏ အရေးကြီးအခန်းကဏ္ဍပင်ဖြစ်သည်။ စစ်မှန်သော နိုင်ငံစုံပူးပေါင်းဆောင်ရွက်ရေးဝါဒ ကျင့်သုံးရေး၊ ကုလသမဂ္ဂ၏ အရေးပါမှု ပိုမိုအားကောင်းအောင် အတူတကွလုပ်ဆောင်ရေး၊ ကုလသမဂ္ဂ ပဋိညာဉ်စာတမ်းပါ ရည်ရွယ်ချက်များ၊ မူဝါဒများနှင့် နိုင်ငံတကာဥပဒေတို့ကို အခြေခံလျက် ကျယ်ပြန့်သော ငြိမ်းချမ်းရေးမူဘောင်တစ်ရပ် ထူထောင်ရန်နှင့် ရေရှည်တည်တံ့သော ငြိမ်းချမ်း‌ရေးကို ဖော်ဆောင်ရန်အလို့ငှာ သဘောတူညီချက်တစ်ရပ် အပြီးသတ်နိုင်အောင် ပံ့ပိုးကူညီရေးအတွက် ကြိုးပမ်းအားထုတ်ကြရန် တရုတ်နိုင်ငံနှင့် ပါကစ္စတန်နိုင်ငံတို့က တိုက်တွန်းလိုက်သည်။ (Xinhua) #China #Pakistan #PutForward #တရုတ်နိုင်ငံ #ပါကစ္စတန်နိုင်ငံ #အဆိုပြု