விருதுநகரில் அதிமுக சார்பில் புரட்சித்தலைவி அம்மாவின் 78-வது பிறந்தநாள்

விருதுநகரில் அதிமுக சார்பில் மறைந்த முன்னாள் முதல்வர் புரட்சித்தலைவி அம்மாவின் 78-வது பிறந்தநாள் விழா வெகுவிமரிசையாகக் கொண்டாடப்பட்டது. விருதுநகர் தேசபந்து மைதானத்தில் நடைபெற்ற இந்த விழாவிற்கு, அதிமுக மேற்கு மாவட்ட அவைத் தலைவர் வழக்கறிஞர் விஜயகுமரன், நகர அவைத் தலைவர் ஜெய்சங்கர் மற்றும் நகரச் செயலாளர் வெங்கடேஷ் ஆகியோர் தலைமை வகித்தனர். நிகழ்ச்சியின் தொடக்கமாக, அலங்கரிக்கப்பட்ட ஜெயலலிதா அவர்களின் திருவுருவப் படத்திற்கு மலர் தூவி மரியாதை செலுத்தப்பட்டது. இதில் மாவட்ட, நகர மற்றும் ஒன்றிய நிர்வாகிகள் உட்பட ஏராளமான மகளிர் அணியினர் மற்றும் கட்சித் தொண்டர்கள் கலந்து கொண்டு அஞ்சலி செலுத்தினர். இதனைத் தொடர்ந்து, விழாவின் சிறப்பம்சமாக அப்பகுதி பொதுமக்களுக்கு மதிய உணவாக பிரியாணி வழங்கப்பட்டது. அம்மாவின் பிறந்தநாளை முன்னிட்டு நடைபெற்ற இந்த அன்னதான நிகழ்வு, கட்சித் தொண்டர்களிடையே பெரும் உற்சாகத்தை ஏற்படுத்தியது.