ဗင်နီဇွဲလား စစ်ဌာနချုပ် အပျက်အစီးဓာတ်ပုံတွေ အမေရိကန်နည်းပညာကုမ္ပဏီ ထုတ်ပြန်

ဗင်နီဇွဲလားသမ္မတ နီကိုလပ်စ် မာဒူရိုကို ဇန်နဝါရီ ၃ ရက်နေ့မှာ အမေရိကန်တပ်ဖွဲ့တွေက ဝင်ရောက်ဖမ်းဆီးခဲ့တဲ့ စစ်ဌာနချုပ် အပျက်အစီး ဂြိုဟ်တုဓာတ်ပုံတွေကို အမေရိကန် နည်းပညာကုမ္ပဏီတစ်ခုဖြစ်တဲ့ Vantor က မနေ့က ထုတ်ပြန်လိုက်ပါတယ်။ "ဖော်ရက်တေး တီယူနာ" (Fuerte Tiuna) လို့ အမည်ရတဲ့ အဲဒီစစ်ဌာနချုပ်ဟာ ဗင်နီဇွဲလားမှာ အကြီးဆုံးစစ်အခြေစိုက်စခန်းဖြစ်ပြီး မြို့တော် ကရာကတ်စ် တောင်ဘက်က တောင်ကုန်းပေါ်မှာ တည်ဆောက်ထားတာဖြစ်ပါတယ်။ တိုက်ခိုက်မှု မခံရခင်နဲ့ တိုက်ခိုက်ခံရအပြီး ဓာတ်ပုံတွေကို ဒီနည်းပညာကုမ္ပဏီက ထုတ်ပြန်ခဲ့ရာမှာ စစ်ဌာနချုပ်ထဲက အဆောက်အအုံ အနည်းဆုံး ၅ လုံးလောက်ကို အမေရိကန်တပ်တွေက ဖျက်ဆီးပစ်ခဲ့တာ တွေ့ရပါတယ်။ အဲဒီ စစ်ဌာနချုပ်အတွင်းမှာ ကွန်တိန်နာတွေ၊ စစ်ကားတွေကို တွေ့ရသလို တိုက်ခိုက်ခံရမှုကြောင့် စခန်းနားက လုံခြုံရေးဂိတ်တစ်ခုလည်း ပျက်စီးသွားခဲ့ပါတယ်။