Tatwamayi TV

ചന്ദ്രയാൻ-3യും ശിവശക്തി പോയിന്റും വീണ്ടും വാർത്തകളിൽ !

ഭൂമിയുടെ ദക്ഷിണധ്രുവത്തിലെ മഞ്ഞുപാളികൾക്കിടയിൽ നിന്ന് നാല് പതിറ്റാണ്ടുകൾക്ക് മുൻപ് കണ്ടെടുത്ത ഒരു അപൂർവ്വ ചന്ദ്രോൽക്കയ്ക്ക്, ഇന്ത്യയുടെ അഭിമാന ദൗത്യമായ ചന്ദ്രയാൻ-3 പേടകം തൊട്ടറിഞ്ഞ ചന്ദ്രോപരിതലവുമായി അടുത്ത ബന്ധമുണ്ടെന്ന നിർണ്ണായക കണ്ടെത്തലുമായി ശാസ്ത്രലോകം രംഗത്തെത്തിയിരിക്കുകയാണ്. അഹമ്മദാബാദിലെ ഫിസിക്കൽ റിസർച്ച് ലബോറട്ടറിയിലെ (പി.ആർ.എൽ) ശാസ്ത്രജ്ഞർ നടത്തിയ പുതിയ പഠനത്തിലാണ്, ഭൂമിയിൽ പതിച്ച 'എ.എൽ.എച്ച്.എ 81005' (ALHA 81005) എന്ന ചന്ദ്രോൽക്കയുടെയും ചന്ദ്രയാൻ-3 ലാൻഡ് ചെയ്ത 'ശിവശക്തി സ്റ്റേഷനിലെ' മണ്ണിലെയും രാസഘടനകൾ തമ്മിൽ അതിശയകരമായ സാമ്യമുണ്ടെന്ന് കണ്ടെത്തിയത്. പ്രശസ്ത അന്താരാഷ്ട്ര ശാസ്ത്ര മാസികയായ 'എൻ.പി.ജെ സ്പെയിസ് എക്സ്പ്ലൊറേഷനിൽ' പ്രസിദ്ധീകരിച്ച ഈ പഠനം ചന്ദ്രന്റെ ഉത്ഭവത്തെയും പരിണാമത്തെയും കുറിച്ചുള്ള ഗവേഷണങ്ങളിൽ പുതിയൊരു വഴിത്തിരിവായി മാറിയിരിക്കുകയാണ്. 2023-ൽ വിക്രം ലാൻഡറും പ്രഗ്യാൻ റോവറും ചന്ദ്രന്റെ ദക്ഷിണധ്രുവത്തിനടുത്ത് നടത്തിയ ശാസ്ത്രീയ പരീക്ഷണങ്ങളുടെ വിവരങ്ങൾ ഭൂമിയിലെ ലഭ്യമായ ഉൽക്കകളുടെ വിവരങ്ങളുമായി ഒത്തുനോക്കിയാണ് ശാസ്ത്രജ്ഞർ ഈ നിഗമനത്തിൽ എത്തിച്ചേർന്നത്. #chandrayaan3 #alha81005 #moonmeteorite #prlahmedabad #shivshaktipoint #isro #lunarresearch #spaceexploration #antarcticmeteorite #planetaryscience